Хүчирхийллийн эсрэг "ОйлГОЁ ХҮНдэлье" аяны хүрээнд Төрийн ордон, НҮБ-ын байрыг улбар шар өнгөөр гэрэлтүүлнэ

НҮБ-ын Хүн Амын Сан, Монгол Улсын Засгийн газар, Иргэний нийгмийн байгууллагууд хамтран  Жендэрт суурилсан хүчирхийлэлтэй тэмцэх 16 хоногийн аяныг "ОйлГОЁ ХҮНдэлье" уриан доор эхлүүллээ.

ЖСХ-тэй тэмцэх 16 хоногийн аяны хүрээнд олон нийтийн ойлголт мэдлэгийг дээшлүүлэх өргөн хүрээтэй үйл ажиллагааг явуулах бөгөөд олон улсын хэмжээнд хүчирхийлэлтэй тэмцэх билэг тэмдэг болсон улбар шар өнгөөр НҮБ-ын байр, Төрийн ордонг гэрэлтүүлэх, сурталчилгааны том, жижиг самбарууд, лед дэлгэц, автобусны буудлын болон олны цуглардаг газруудын сурталчилгааны самбаруудаар аяны уриа, мессежийг байрлуулж олон нийтэд түгээх юм. 

Энэ аян нь охид, эмэгтэйчүүдийн эсрэг хүчирхийллийг таслан зогсоох олон улсын өдөр буюу 11 сарын 25-нд эхэлж, Хүний эрхийн өдөр буюу 12 сарын 10 хүртэл үргэлжилдэг бөгөөд олон улсын хэмжээнд 1991 оноос, Монгол Улсын хувьд 1997 оноос эхлэн тэмдэглэж эхэлжээ. 

Төрийн ордны Г танхимд болсон "ОйлГОЁ ХҮНдэлье" хэвлэлийн бага хурлын үеэр Монгол дахь НҮБХАС-ын тэргүүн Каори Ишикава "ЖСХ нь эрэгтэй, эмэгтэй хүмүүсийн болон гэр бүл нийгэмд тэдний гүйцэтгэх үүргийн талаарх хэвшмэл ойлголт хандлага, итгэл үнэмшлээс үүдэлтэй. Үүнийг таслан зогсоохын тулд энэ чиглэлийн ойлголт, хандлага итгэл үнэмшлийг бие биедээ нээлттэй, нэгнээ ойлгож, хүндлэлтэй хандсанаар өөрчлөх боломжтой" хэмээлээ. 

Харин УИХ-ын гишүүн Ц.Мөнх-Оргил эрэгтэйчүүд, залуучууд, хөвгүүдийг ЖСХ-ийг бууруулахад идэвхитэй оролцож, энэ аяны хүрээнд өөрсдийн дуу хоолойгоо хүргэхийг уриаллаа. Мөн тэрээр "ЖСХ бол дан ганц эмэгтэйчүүдийн асуудал биш нийгмийн тэр дундаа эрэгтэйчүүдийн асуудал шүү. Монголд таван эмэгтэй тутмын нэг нь өөрөө ажлын байрны бэлгийн дарамтанд өртөж байсан гэсэн бол гурван эмэгтэйн нэг нь тэр төрлийн хүчирхийлэлд өртөж байсан хүнийг танина, харсан гэж мэдээлсэн байна. Ажлын байрны бэлгийн дарамтанд өртөж буй хүмүүсийн 95 хувь нь залуу охид, эмэгтэйчүүд байна. Мөн хохирогчдын 57.6 хувь нь төрийн албан хаагч байгаа бол үйлдэгчдийн 47 хувь нь мөн төрийн албан хаагчид байна. Тиймээс "Төрийн албаны тухай хууль"-д төрийн бүх албан хаагч нар энэ төрлийн хүчирхийлэл хийхийг хориглосон утга бүхий нэмэлт өөрчлөлт орж байгаа. Түүнчлэн хохирогчдын 45.1 хувь нь ажлын байрны бэлгийн дарамтанд өртсөнөө хэнд ч хэлээгүй, хамт ажилладаг, тэр тусмаа ахмад эмэгтэйчүүд нь хохирогчдыг буруутгадаг гэсэн судалгаа гарсан байна. Ажлын байрны бэлгийн дарамтыг "Хөдөлмөрийн тухай хууль"-д хэд хэдэн заалтаар оруулж байгаа. Мөн "Эрүүгийн тухай хууль", "Зөрчлийн тухай хууль"-д эн төрлийн гэмт хэргийн заалт оруулахаар хэлэлцэгдэж байна. Ажлын байрны бэлгийн дарамтыг ажил олгогч төдийгүй эргэн тойрных нь хүмүүс заавал мэдээлж байх заалт оруулж байна. Ажлын байрны бэлгийн дарамт нь нуугдмал, нотлоход хэцүү гэмт хэрэг учраас үүнээс урьдчилан сэргийлэх сэрэмжлүүлэг бүхий "Ёс зүйн журам"-ыг байгууллага бүр гаргахыг хуульд зааж өгнө" гэлээ. 

Аяны нээлтэд зориулж өнөө орой 17:30-18:00 цагийн хооронд НҮБ-ын Улаанбаатар хот дахь төв байранд “ХҮЧИРХИЙЛЛИЙН ЭСРЭГ ХАМТДАА ГЭРЭЛТҮҮЛНЭ” арга хэмжээ болно. Монголд анх удаа болох энэ арга хэмжээний үеэр НҮБ-ын байр, Төрийн ордон зэрэг барилга байгууламжийг хүчирхийллийн эсрэг бэлгэдэл улбар шар өнгөөр гэрэлтүүлж гэрлийг нэгэн зэрэг асаах ажээ.

---