ОЛОН УЛСЫН ЭМЭГТЭЙЧҮҮДИЙН ЭРХИЙН ӨДӨРТ

Охид эмэгтэйчүүд айх аюулгүй, хүссэн мэргэжлээ эзэмшиж, мэдлэг чадвараа бодитоор үнэлүүлж, нэр төртэй амьдрах нөхцөл боломжийг бүрдүүлэх, сайхан нийгмийг цогцлоохын төлөө Монголын Эмэгтэйчүүдийн Холбоо өнгөрсөн түүхийн бүхий л он жилүүдэд тасралтгүй ажиллаж ирсэн.

1924 онд байгуулагдсан Намын төв хорооны дэргэдэх “Бүсгүйчүүдийг боловсруулах тасаг” нь улсын хүн ам 800 мянга хүрэхгүй байх үед эх нялхсыг хамгаалах, ард иргэдийг соёлжуулах, бичиг үсэгт сургах, ахуйн соёлыг түгээх их ажлуудыг өрнүүлж байв. Түүнчлэн дайны хүнд жилүүдэд монгол бүсгүйчүүд эрчүүдийн нэгэн адил эх орноо хамгаалах үйлсэд гар бие оролцон, фронтын хангамжийг бүрдүүлэх, социализмийн их бүтээн байгуулалтын он жилүүдэд ээжүүд хүүхдээ төрүүлж өсгөхийн сацуу ажил хөдөлмөрөө эрхлэн, хөдөлмөрийн талбарт эрчүүдтэй нэгэн ижил эрх үүрэгтэй, орлоготой ажиллан, улмаар Монголын эмэгтэйчүүдийн хороо болон өргөжин тэлж, нийгмийн олон олон асуудлыг шийдвэрлэх стратегийг төрийн бодлогод тусгуулж, хэрэгжүүлэх үйл үйл ажиллагааг орон даяар хариуцлагатайгаар зохион байгуулж, байсан юм.

Чөлөөт зах зээлд шилжсэн ардчиллын он жилүүдэд Монгол улс нэг намын системээс гарч, өөрчлөлт шинэчлэлтийн шаардлагаар #МЭХ-ны аймаг, нийслэлийн дүүргийн Эмэгтэйчүүдийн салбар зөвлөл нэгдэн, тус хороо Монголын Эмэгтэйчүүдийн Холбоо хэмээх, охид эмэгтэйчүүдийн нийтлэг эрх ашгийг илэрхийлэн хамгаалах төрийн бус байгууллага болсон түүхтэй.

Зах зээлийн хүнд он жилүүдэд #МЭХ ТББ нь 21 аймаг, 300 гаруй сумын салбар зөвлөлөөр дамжуулан ядуурлыг бууруулах, хөдөөгийн эмэгтэйчүүдийг ажил орлоготой болгох ур чадварын сургалтуудыг явуулж, жижиг зээлийн санхүүжилт олгон, хадгаламж хуримтлалтай болгох чиглэлээр анх удаа олон улсын томоохон төслүүдийг амжилттай хэрэгжүүлж, 10,000 гаруй эмэгтэйчүүдийн гарааны бизнесийг дэмжсэн.

Өнөөдөр ч бид 96 жилийн өмнө дэвшүүлсэн охид, эмэгтэйчүүдийн сайн сайханд чиглэсэн зорилгоо үргэлжлүүлж, ялангуяа хүчирхийлэл, ялгаварлалд өртөж буй, улс төр, нийгэм, соёл, эдийн засгийн эрхээ хөвгүүд, эрэгтэйчүүдийн нэгэн адил эдлэж чадахгүй байгаа эмзэг бүлгийн, алслагдсан бүс нутгийн охид, эмэгтэйчүүдийн эрхийг хамгаалах, хангахын төлөө шинэ зорилтууд дэвшүүлэн ажиллаж байна. Энэхүү үйл хэрэгт мөн л 21 аймаг, 9 дүүрэг, 300 гаруй сумын Эмэгтэйчүүдийн зөвлөлийн халуун сэтгэлт эмэгтэйчүүдтэйгээ эв санаагаа нэгтгэн зүтгэж байгаа билээ.
 

ОЛОН УЛСЫН ЭМЭГТЭЙЧҮҮДИЙН ЭРХИЙН ӨДӨР-ийг тохиолдуулан

“Хүчирхийлэл, гадуурхал, ялгаварлалгүй нийгэм, тогтвортой хөгжлийг хүсвэл хүний эрхийг охид, эмэгтэйчүүдэд бүрэн эдлүүлэх ёстой” гэсэн дэлхий нийтийн зарчмыг хамтран хэрэгжүүлэхийг та бүхэнд уриалж байна.
Хацар гоо охид, хатан ухаант бүсгүйчүүддээ “МАРТ-8”-ны мэнд дэвшүүлье!

МЭХ-ны Ерөнхийлөгч

Удирдах зөвлөл

---